ನಮ್ಮ ಪಯಣ ಪ್ರಾರಂಭವಾದದ್ದು ಶಿಕ್ಷಣ ಕ್ಷೇತ್ರದಲ್ಲಿ. ಈ ಕ್ಷೇತ್ರವು ಈಗಲೂ ನಮ್ಮ ಎಲ್ಲ ಕಾರ್ಯಚಟುವಟಿಕೆಗಳ ಕೇಂದ್ರ ಬಿಂದುವಾಗಿದೆ
ದೇಶದ ಬೃಹತ್ ಸಾರ್ವಜನಿಕ ಶಿಕ್ಷಣ ವ್ಯವಸ್ಥೆಯ ಮೂಲಕ ಎಲ್ಲರಿಗೂ ಗುಣಮಟ್ಟದ ಹಾಗೂ ಮೌಲ್ಯಾಧಾರಿತ ಶಿಕ್ಷಣವನ್ನು ಒದಗಿಸುವುದು ನಮ್ಮ ಗುರಿ. ನಮ್ಮ ಕೆಲಸಗಳಿಗೆ ಸಹಯೋಗ ಪ್ರಮುಖವಾದುದು, ಹಾಗೂ ನಾವು ಶಾಲಾ ಶಿಕ್ಷಣದ ಹಲವು ಅಂಶಗಳ ಮೇಲೆ ಸರಕಾರಗಳೊಂದಿಗೆ ಕೆಲಸ ಮಾಡುತ್ತೇವೆ: ಉದಾಹರಣೆಗೆ, ಈ ಕಾರ್ಯಕ್ಷೇತ್ರದಲ್ಲಿ ಶಿಕ್ಷಕರ ಹಾಗೂ ಇತರ ಶೈಕ್ಷಣಿಕ ಅಧಿಕಾರಿಗಳ ಸಾಮರ್ಥ್ಯ, ಜ್ಞಾನ ಹಾಗೂ ದೃಷ್ಟಿಕೋನಗಳನ್ನು ವೃದ್ಧಿಸುವುದು, ಪಠ್ಯಪುಸ್ತಕ ಹಾಗೂ ಪಠ್ಯಕ್ರಮ ಅಭಿವೃದ್ಧಿ, ಶಾಲೆಗಳಲ್ಲಿ ಉತ್ತಮ ಅಭ್ಯಾಸಗಳನ್ನು ಪ್ರೋತ್ಸಾಹಿಸುವುದು, ಇತ್ಯಾದಿ.
ಬೆಂಗಳೂರು ಮತ್ತು ಭೋಪಾಲ್ ನಲ್ಲಿರುವ ಅಜೀಂ ಪ್ರೇಮ್‌ಜಿ ವಿಶ್ವವಿದ್ಯಾಲಯವು ಶಿಕ್ಷಣದ ಸಾಮಾಜಿಕ ಉದ್ದೇಶದೆಡೆಗಿನ ನಮ್ಮ ಬದ್ಧತೆಯನ್ನು ಮುಂದುವರಿಸುತ್ತಿದೆ.
ಆರೋಗ್ಯ ಮತ್ತು ಜೀವನೋಪಾಯ ನಿರ್ವಹಣೆ – ಇವು ಶಿಕ್ಷಣದ ಆಚೆ ನಾವು ಕೆಲಸ ಮಾಡುವ ಇನ್ನಿತರ ಎರಡು ಪ್ರಮುಖ ಕ್ಷೇತ್ರಗಳು. ಈ ಎರಡು ಕ್ಷೇತ್ರಗಳಲ್ಲಿ ಕೂಡ ನಾವು ಸರಕಾರಗಳೊಂದಿಗೆ ಸಹಯೋಗ ಹೊಂದಿರುವುದಲ್ಲದೆ ದೇಶದಾದ್ಯಂತ ಹಲವಾರು ಪಾಲುದಾರರೊಂದಿಗೆ ಕೆಲಸ ಮಾಡುತ್ತೇವೆ.
ನಮ್ಮ ಲೋಕೋಪಕಾರ ಘಟಕ ಹಾಗೂ ಕಲೆ ಮತ್ತು ಸಂಸ್ಕೃತಿ ಕಾರ್ಯಗಳೊಂದಿಗೆ ನಮ್ಮ ಕಾರ್ಯಕ್ಷೇತ್ರವು ಮತ್ತೂ ವಿಸ್ತಾರವಾಗಿ ಮತ್ತು ವೈವಿಧ್ಯಮಯವಾಗಿ ಬೆಳೆಯುತ್ತದೆ. ಲೋಕೋಪಕಾರ ಘಟಕದ ನಮ್ಮ ಅನುದಾನ ಕಾರ್ಯಕ್ರಮಗಳು ಭಾರತದ ವಿವಿಧ ಭಾಗಗಳಲ್ಲಿ ಕೆಲಸ ಮಾಡುತ್ತಿರುವ 800ಕ್ಕೂ ಹೆಚ್ಚಿನ ಲಾಭೋದ್ದೇಶರಹಿತ ಸಂಸ್ಥೆಗಳಿಗೆ ಬೆಂಬಲ ನೀಡುತ್ತಿವೆ. ನಮ್ಮ ಕಲೆ ಮತ್ತು ಸಂಸ್ಕೃತಿ ಕಾರ್ಯವು ಕಥನಗಳ ಮೂಲಕ ಫೌಂಡೇಷನ್ ನ ಉದ್ದೇಶವನ್ನು ಅಭಿವ್ಯಕ್ತಿಸುತ್ತದೆ.
ಶಾಲಾ ಶಿಕ್ಷಣ
ವಿದ್ಯಾರ್ಥಿಗಳು ಉತ್ತಮವಾಗಿ ಕಲಿಯಲು ಶಿಕ್ಷಕರು ಉತ್ತಮವಾಗಿ ಕಲಿಸಬೇಕಿರುವುದರಿಂದ ಅವರಿಗೆ ನಾವು ನೆರವಾಗಲು ಪ್ರಯತ್ನಿಸುತ್ತೇವೆ.
ವಿಶ್ವವಿದ್ಯಾಲಯ
ನಮ್ಮ ವಿಶ್ವವಿದ್ಯಾಲಯವು ಸಾಮಾಜಿಕ ಕ್ಷೇತ್ರದ ಸಾಮರ್ಥ್ಯಾಭಿವೃದ್ಧಿಗಾಗಿ ಕೊಡುಗೆ ನೀಡುತ್ತದೆ.
ಆರೋಗ್ಯ
ಹಳ್ಳಿಗಳಲ್ಲಿ ಮತ್ತು ನಗರದ/ವಲಸಿಗರ ಪ್ರದೇಶಗಳಲ್ಲಿ ದುರ್ಬಲ ಸಮುದಾಯಗಳ ಜನರ ಆರೋಗ್ಯವನ್ನು ಸುಧಾರಿಸಲು ಶ್ರಮಿಸುತ್ತೇವೆ.
ಜೀವನೋಪಾಯಗಳು
ಹೆಚ್ಚಿನ ಮತ್ತು ಸುಸ್ಥಿರ ಆದಾಯದೊಂದಿಗೆ ಜನರ ಘನತೆಯು ತಳುಕುಹಾಕಿಕೊಂಡಿದೆ. ಇದನ್ನು ಸಾಧಿಸಲು ನಾವು ವಿವಿಧ ಗುಂಪುಗಳು ಮತ್ತು ಸಮುದಾಯಗಳಿಗೆ ನೆರವು ನೀಡುತ್ತೇವೆ.
ಇತರ ಕ್ಷೇತ್ರಗಳು
ಅನುದಾನಗಳು ಮತ್ತು ಕಲೆ ಮತ್ತು ಸಂಸ್ಕೃತಿ ಕ್ಷೇತ್ರಗಳಲ್ಲಿನ ನಮ್ಮ ಉಪಕ್ರಮಗಳು ಸಾಮಾಜಿಕ ಕ್ಷೇತ್ರದಲ್ಲಿನ ನಮ್ಮ ಕೆಲಸದ ವ್ಯಾಪ್ತಿ ಮತ್ತು ಪ್ರಸ್ತುತತೆಯನ್ನು ಹೆಚ್ಚಿಸುತ್ತವೆ.
